Bora mposht Golden Eagle Yllin dhe arrin fitoren e katërt radhazi në Superligë

Bora ka vazhduar ecurinë pozitive në Superligën e Kosovës në basketboll, duke regjistruar fitoren e katërt radhazi në ndeshjen e xhiros së nëntë të zhvilluar të shtunën mbrëma në palestrën “1 Tetori”. Skuadra prishtinase e mposhti Golden Eagle Yllin me rezultat 81:65, edhe pse mysafirët e nisën më mirë takimin duke e fituar çerekun e parë 23:16. Vendasit reaguan në dhjetëminutëshin e dytë për ta ngushtuar epërsinë në 35:34 para shkuarjes në pushim, ndërsa në çerekun e tretë përmbysën shifrat për të krijuar avantazh prej gjashtë pikësh, 58:52, për ta konfirmuar fitoren bindëse në periudhën e fundit.

Në këtë përballje, lojtari më i dalluar te Bora doli të jetë Laolu Oke me 19 pikë e 11 kërcime, kurse Muhamedali Janjeva shtoi 15 pikë dhe gjashtë kërcime. Te skuadra e Golden Eagle Yllit u veçua Lis Shoshi me dhjetë pikë, 14 kërcime dhe një asistim. Pas këtij takimi, Bora regjistron bilanc prej shtatë fitoreve e dy humbjeve, kurse për Yllin kjo shënon disfatën e katërt të sezonit krahas pesë fitoreve.