Golden Eagle Ylli mposht Rahovecin 029 në xhiron e shtatë të Superligës

SUHAREKË — Golden Eagle Ylli është rikthyer te fitorja në ProCredit Superligën e Kosovës në basketboll, duke mposhtur Rahovecin 029 me rezultatin 93:79 në ndeshjen e vlefshme për xhiron e shtatë. Skuadra nga Suhareka reagoi pas disfatës së pësuar në xhiron e kaluar nga kampionia Trepça dhe e kontrolloi takimin në palestrën „13 Qershori“.

Çereku i parë u mbyll baras 24:24, ndërsa vendasit fituan çerekun e dytë 19:15 për të shkuar në pushim me katër pikë epërsi, 43:39. Në pjesën e dytë, Ylli i fitoi dy çerekët e fundit me shifrat 20:17 dhe 30:23, duke e thelluar epërsinë para tifozëve të saj.

Connor Withers ishte ndër lojtarët kryesorë te Yllit, duke e mbyllur takimin me 16 pikë, shtatë kërcime dhe shtatë asistime, kurse Lis Shoshi kontribuoi me 12 pikë, nëntë kërcime dhe tri asistime. Te Rahoveci 029, Zion Fruster u tregua më efikasi me 20 pikë, katër kërcime dhe tri asistime, ndërsa Mika Adams regjistroi 16 pikë, shtatë kërcime dhe gjashtë asistime.

Me këtë sukses, Ylli regjistron fitoren e katërt krahas tri humbjeve në shtatë ndeshje, ndërsa Rahoveci 029 mbetet me dy fitore dhe pesë humbje.