Sa do të jetë bonusi i verës për pensionistët dhe personat me aftësi të kufizuar?

TIRANË — Kryeministri Edi Rama njoftoi një bonus të ri për pensionistët, i lidhur drejtpërdrejt me rritjen e të ardhurave nga çmimi i naftës. Në një takim me pensionistë, Rama theksoi se qeveria do të jetë pranë tyre sa herë që ekonomia lejon.

“Vitin e shkuar u tha se po japim bonus për fushatë, por këtë vit nuk kemi fushatë. Ky bonus vjen nga vëmendja që kemi premtuar se do të kemi vijimsisht,” shpjegoi ai. Rama shtoi se rritja e të ardhurave nga nafta ishte një komponent i paparashikuar, por që do të shkojë drejt pensionistëve.

“Rritjen do ta keni ju. Edhe ata që u ankuan për rritjen e çmimit të naftës, kanë kontribuar për rritjen tuaj,” tha Rama. Ai sqaroi se kjo rritje nuk do të prekë vetëm pensionistët, por edhe personat me aftësi të kufizuar, për të cilët ndihma do të dyfishohet.

“Janë fëmijët me aftësi të veçanta, u mor vendimi dhe fillon zbatimi për të dyfishuar ndihmën. Është i parashikuar në çdo buxhet,” theksoi Rama. Ai shtoi se shteti do të mbulojë edhe barrën e kujdestarëve për personat me aftësi të kufizuar, një problem që ka qenë i pazgjidhur deri tani.

Rama theksoi se kjo masë është pjesë e një strategjie më të gjerë për të rritur cilësinë e jetës për kategoritë më të cenueshme. “Kemi pasur probleme me barrën e kujdestarëve, por këto do t’i paguajë shteti,” deklaroi ai.

Ndërkohë, Rama përmendi edhe rritjen e përgjithshme të të ardhurave, duke theksuar se kjo ka ndikuar pozitivisht në mundësinë për të ofruar mbështetje shtesë. “Nuk janë vetëm pensionistët, por edhe personat me aftësi të kufizuar do të përfitojnë,” tha ai.

Kryeministri nuk sqaroi sasinë e saktë të bonusit, por theksoi se do të jetë një ndihmë konkrete për të gjithë ata që kanë nevojë. Margarita Mustafaj, një pensioniste që i shkroi një mesazh Ramës, kishte kërkuar më parë transparencë për ndihmat sociale.

Burim: ABC News
— Redaksia ZHURMA