Bllokohet përkohësisht qarkullimi në Rrugën B për shkak të çiklizmit
Zhvillimi i garës urbane të çiklizmit sjell kufizim të qarkullimit të automjeteve në një segment të Rrugës B.
Redaksia ZHURMA · · Përditësuar · 1 min lexim
Gara urbane e çiklizmit e quajtur «Criterium Prishtina» ka sjellë bllokimin e përkohshëm të një pjese të Rrugës B për qarkullimin e automjeteve. Sipas njoftimit të lëshuar nga Komuna e Prishtinës, kufizimi i qarkullimit do të jetë i vlefshëm sot nga ora 08:30 deri në 12:00.
Sipas autoriteteve komunale, zona e cila do të jetë e kufizuar përfshin segmentin nga pjesa poshtë te rrethi i lidhjes me Rrugën A e deri lart te rrethi i Maxi 24. Megjithatë, qarkullimi në rreth-rrotullimin te Maxi 24 nuk do të bllokohet tërësisht, pasi shiriti i tij i brendshëm do të mbetet i hapur për qarkullim normal.
Për të shmangur vonesat e mundshme dhe ngarkesën e trafikut gjatë kësaj kohe, komuna u ka bërë thirrje qytetarëve që të shfrytëzojnë rrugët alternative. Ndër opsionet e sugjeruara për qarkullim janë Rruga A, Rruga C dhe Rruga «Fadil Vata» përmes lagjes Bregu i Diellit.
