Besiane Musmurati paralajmëron koncertet 'n'Lagje' në Prishtinë
Programi përfshin 10 lagje të Prishtinës, me koncerte çdo mbrëmje nga ora 20:00, duke filluar më 5 gusht në Dardani.
PRISHTINË — Nënkryetarja e Kryeqytetit, Besiane Musmurati, ka paralajmëruar fillimin e programit veror "n'Lagje", një seri koncertesh me muzikë live që do të mbahen në lagje të ndryshme të Prishtinës gjatë muajit gusht. Programi synon ta afrojë kulturën me qytetarët, duke i kthyer hapësirat publike në vende takimi ku muzika dhe komuniteti bashkohen.
Koncertet do të organizohen në Dardani, Muharrem Fejza, Muhaxherë, Ulpianë, Hajvali, Kolovicë, Breg të Diellit, Kodra e Trimave, Matiqan dhe Kalabri, duke filluar çdo mbrëmje nga ora 20:00. Koncerti i parë mbahet më 5 gusht në lagjen Dardani, në hapësirën Mbi Kurriz.
Në skenën e "n'Lagje" do të performojnë artistët Nita Latifi, Offchestra, Florent Abrashi dhe String String, të cilët do të jenë pjesë e mbrëmjeve të ndryshme përgjatë programit. Programi organizohet nga Drejtoria e Kulturës e Kryeqytetit dhe është pjesë e aktiviteteve verore që synojnë aktivizimin e hapësirave publike.
Nënkryetarja Musmurati theksoi se Kryeqyteti po investon në programe që e bëjnë kulturën më të qasshme për të gjithë qytetarët. "Koncerte e kulturë s'duhet me pas veç n'Shesh. Ato duhet me qenë edhe aty ku jetojnë qytetarët", u shpreh nënkryetarja në një deklarat për Epokën e Re.
Burim: Epoka e Re
— Redaksia ZHURMA
