Musmurati: Murati nuk po e nënshkruan kredinë 74 milionëshe për pastrimin

PRISHTINË — Nënkryetarja e Komunës së Prishtinës, Besianë Musmurati, deklaroi se Ministri i Financave, Hekuran Murati, nuk po e nënshkruan kredinë prej 74 milionë eurosh për pastrimin e kryeqytetit. Kjo deklaratë erdhi pasi zyrtarët komunalë zhvilluan një takim me përfaqësuesit e Bankës Zhvillimore Gjermane, KfW, të cilët sipas saj e rikonfirmuan bllokimin e kësaj marrëveshjeje.

Sipas Musmuratit, ky projekt bazohet në një marrëveshje që Qeveria e Kosovës e kishte nënshkruar dy vite më parë me Qeverinë Gjermane. Përmes investimit nga KfW-ja parashikohej furnizimi me mjete dhe ngritja e infrastrukturës menaxhuese për mbeturinat në gjithë rajonin.

Nënkryetarja e Prishtinës njoftoi se takimi me delegacionin e KfW-së u mbajt një ditë më parë, ku ajo mori pjesë së bashku me kryeshefin e Kompanisë Rajonale të Mbeturinave «Pastrimi». Musmurati pohoi se në kuadër të kësaj kredie 74 milionëshe parashihej blerja e mbi 100 kamionëve të rinj, vendosja e 10 mijë kontejnerëve, si dhe ndërtimi i një qendre të mirëfilltë për riciklimin e mbeturinave.

Përmes një postimi në rrjetin social Facebook, Musmurati e cilësoi vendimin e ministrit si një veprim për inate politike që dëmton pastrimin e qytetit. Ajo shtoi se Komuna e Prishtinës do të kërkojë rrugë të tjera për të përmirësuar shërbimet e pastrimit, ndërsa pretendoi se qytetarët nuk do ta harrojnë këtë bllokadë.

«Është e turpshme, e dhimbshme dhe qyqare që një ministër për inate politike të bllokojë pastrimin e Prishtinës», ka thënë Musmurati në statusin e saj në Facebook.

«100 kamionë të rinj, 10 mijë kontenjerë, qendër për riciklim të mbeturinave janë investime që po humbin sepse Hekuran Murati mbanë inate politike», ka shkruar nënkryetarja e Prishtinës.

«Ne nuk do të ndalemi, do të gjejmë forma tjera të pastrimit të qytetit, por qytetarët e Prishtinës nuk do të falin papërgjegjësinë e skajshme të një partie që ka për qëllim bllokadën e jo zhvillimin», ka përfunduar Musmurati.