Zemaj: Qeveria po ngatërron licencimin e mjekëve me punësimin

Deputeti i Lidhjes Demokratike të Kosovës, Armend Zemaj, ka reaguar ashpër ndaj Qeverisë duke deklaruar se ekzekutivi po e paraqet gabimisht licencimin e mjekëve të kthyer nga jashtë si punësim në institucionet publike shëndetësore, ndërkohë që në vend numërohen 534 mjekë të papunë dhe 91 prej tyre janë specialistë.

Ky reagim vjen pas deklaratave të mëparshme të ekzekutivit për kthimin e profesionistëve shëndetësorë. Më parë, kryeministri Albin Kurti kishte deklaruar se vetëm gjatë vitit 2025 janë kthyer 171 mjekë nga vendet e ndryshme të Evropës për të ushtruar profesionin e tyre në Kosovë, shifër kjo që ka nxitur debatin e ashpër politik mbi gjendjen reale të punësimit në sektorin shëndetësor.

Ish-ministri i Shëndetësisë ka theksuar përmes një postimi në rrjetet sociale se qeveritarët nuk po bëjnë dallimin ndërmjet procedurës administrative të licencimit dhe punësimit të rregullt, duke shtuar se ky proces po keqpërdoret për të krijuar rezultate fiktive. Sipas të dhënave që ka publikuar deputeti opozitar, gjendja e papunësisë në radhët e profesionistëve të shëndetësisë mbetet e lartë, ndërsa pretendimet e ekzekutivit për punësimin e mjekëve të kthyer nuk qëndrojnë. Ai ka deklaruar se sa u përket mjekëve të kthyer nga jashtë dhe të punësuar me kontrata të rregullta gjatë qeverisjes së Lëvizjes Vetëvendosje, jo 171, por as një numër dyshifror nuk po arrijnë ta dëshmojnë.

Deputeti i LDK-së ka kërkuar që matja e suksesit në shëndetësi të bëhet mbi bazën e numrit real të të punësuarve, duke kritikuar qasjen e deritanishme të qeveritarëve. «Një qeveri që nuk bën dallimin ndërmjet licencimit dhe punësimit të mjekëve në sistemin publik shëndetësor, po përpiqet ta paraqesë një proces administrativ si rezultat të punësimit. Çfarë të themi!!! Praktikantë të përhershëm në premtime, por premtimet nuk janë rezultate», ka shkruar Zemaj.