Musmurati: Hekuran Murati po bllokon blerjen e 100 kamionëve

Nënkryetarja e Prishtinës, Besianë Musmurati, deklaroi gjatë një konference për media se Ministria e Financave, e udhëhequr nga Hekuran Murati, po bllokon projektin 74 milionësh për pastrimin e kryeqytetit përmes mosnënshkrimit të marrëveshjes me Bankën Gjermane për Zhvillim për blerjen e 100 kamionëve të rinj.

Projekti për modernizimin e sistemit të mbledhjes dhe menaxhimit të mbeturinave ka nisur para më shumë se tri vitesh, ndërsa kapacitetet aktuale të Kompanisë Rajonale të Pastrimit janë dëmtuar rëndë. Sipas nënkryetares Musmurati, nisma për marrëveshjen e kredisë me KfW-në dhe Kompaninë e Pastrimit u miratua përmes vendimit të Qeverisë së Kosovës më 18 dhjetor 2024, i cili mban numrin 17 për 238 dhe u nënshkruan nga kryeministri Albin Kurti.

Detajet e prezantuara tregojnë se projekti ndahet në dy faza, ku e para përfshin një grant prej 4.1 milionë eurosh nga Qeveria gjermane dhe një kredi të butë prej 20 milionë eurosh, kurse faza e dytë parasheh investime prej 50 milionë eurosh. Kredia e butë ka maturitet prej 38 vjetësh, periudhë grejs prej gjashtë vjetësh dhe normë interesi prej 0.75 për qind. Marrëveshja e parë u arrit në tetor të vitit 2023 nga kryetarët e komunave të rajonit të Prishtinës, ministrat përkatës, Kompania e Pastrimit dhe Banka Gjermane për Zhvillim, ndërsa më 30 prill 2024 nisën negociatat zyrtare bilaterale ndërmjet dy qeverive.

Më 10 shtator 2024, Ministria e Financave u njoftua për miratimin e projektit në vlerë prej 24.1 milionë eurosh për fazën e parë dhe 50 milionë eurosh për fazën e dytë, kurse më 26 shtator 2024 u dërguan draft-marrëveshjet. Përveç blerjes së kamionëve, projekti parasheh edhe shpërndarjen e 10 mijë kontejnerëve dhe investime të tjera infrastrukturore.

Musmurati ka thënë se «për me qenë korrekt, për të treguar gjendjen reale në raport me Bankën Gjermane për Zhvillim, unë do të paraqes të gjitha faktet për këtë projekt që po dështon për shkak se Ministria e Financave nuk po e nënshkruan». Ajo shtoi se «që nga shtatori 2024, Hekuran Murati e ka pasur në tavolinë nënshkrimin e kredisë për implementimin e këtij projekti për pastrimin e Prishtinës», si dhe theksoi se kryeministri Albin Kurti e obligon Hekuran Muratin të bëjë implementimin e këtij projekti.