Shqipëria planifikon emetimin e Eurobondit rekord me vlerë 688 milionë euro

Shqipëria bëhet gati për daljen e tetë në tregjet financiare ndërkombëtare brenda 17 viteve, me synimin për të emetuar një Eurobond të ri gjatë vitit 2027. Sipas projektbuxhetit, vlera e këtij instrumenti parashikohet në 62.6 miliardë lekë, e cila me kursin aktual të këmbimit llogaritet përafërsisht në 688 milionë euro, duke e shënuar si eurobondin më të madh të ndërmarrë ndonjëherë nga vendi.

Përveç këtij obligacioni të emetuar jashtë vendit, huamarrja e huaj gjatë vitit 2027 vlerësohet të arrijë në rreth 118.2 miliardë lekë, fonde që do të sigurohen përmes disbursimit të huave për projektet prioritare të qeverisë dhe mbështetjeve buxhetore. Duke llogaritur edhe borxhin e huaj që shlyhet gjatë vitit, huamarrja e huaj neto do të rezultojë në nivelin 22.6 miliardë lekë. Obligacionet e tilla u sigurojnë qeverive qasje te investitorët ndërkombëtarë për financimin e borxhit.

Historiku i këtyre daljeve daton që nga viti 2010, kur u emetua Eurobondi i parë prej 300 milionë eurosh me afat maturimi pesëvjeçar, një borxh që tashmë është shlyer plotësisht, ndërsa dalja e fundit e vendit në këto tregje u regjistrua në vitin 2025.