Ndryshon ligji për turizmin, qiratë ditore kërkojnë regjistrim

Projektligji i ri për turizmin, i rihedhur për konsultim publik, sjell detyrime të reja për akomodimet afatshkurtra, agjencitë turistike dhe subjektet që menaxhojnë plazhet. Çdo apartament, vilë apo dhomë që jepet me qira përmes platformave si Airbnb dhe Booking ose drejtpërdrejt, do të duhet të regjistrohet në portalin e-Albania para fillimit të veprimtarisë për t'u pajisur me një kod unik regjistrimi, i cili bëhet i detyrueshëm në çdo reklamë online.

Nisma synon kontrollin e tregut dhe përfshin gjithashtu agjencitë turistike, ku parashikohet ngritja e një fondi të posaçëm për mbulimin e shpenzimeve të udhëtarëve në rast falimentimi të subjektit, si dhe detyrimin e sigurimit të përgjegjësisë ndaj palëve të treta. Për pushuesit dhe administrimin e vijës bregdetare, rregullat kërkojnë që subjektet e stacioneve të plazhit të garantojnë akses të lirë dhe të pandërprerë të publikut drejt bregut të detit, pa barriera apo gardhe.

Për shkeljet në këtë sektor, kuadri i ri parashikon gjoba deri në 400 mijë lekë, ndërsa mungesa e vrojtuesit të plazhit sanksionohet me gjobë prej 200 mijë lekësh, e cila dyfishohet në rast përsëritjeje.