Sindikata: Të paraqitet urgjentisht programi i detajuar për pagat

Sindikata e Gardës së Republikës u ka bërë thirrje institucioneve përgjegjëse dhe Sektorit të Financës që të paraqesin urgjentisht pranë Ministrisë së Financave programin e detajuar për rritjen e pagave. Përmes një reagimi publik, kjo sindikatë ka kërkuar ndërhyrje konkrete për përmirësimin e trajtimit financiar të punonjësve të këtij institucioni.

Kjo kërkesë vjen pas thirrjeve të mëparshme për dialog lidhur me trajtimin financiar të punonjësve, ku tashmë kërkohet kalimi në hapa urgjentë dhe konkretë nga strukturat përgjegjëse pa u shtyrë më tej kjo çështje.

Sipas Sindikatës së Gardës së Republikës, që prej vitit 2001 ky institucion nuk është vlerësuar financiarisht në nivelin e duhur. Në njoftim theksohet se dikur ka ekzistuar një diferencë meritore prej 15 mijë lekësh më shumë në krahasim me punonjësit e institucioneve të tjera të sigurisë, por sipas tyre kjo diferencë tashmë është shkrirë plotësisht duke cenuar dinjitetin ekonomik të punonjësve.

Gjithashtu, sipas Sindikatës, arsyet pse kjo rritje është e padiskutueshme lidhen me faktin se shërbimi i tyre karakterizohet nga presioni i vazhdueshëm, gatishmëria maksimale dhe vështirësitë e veçanta në çdo sekondë. Po ashtu, përgjegjësia për sigurinë e personaliteteve të larta shtetërore, vendase apo të huaja, nuk lejon asnjë gabim, ku sipas tyre nuk ka kurrë herë të parë pasi siguria e tyre është imazhi i vetë shtetit.

Në përfundim të reagimit të tyre publik, Sindikata e Gardës së Republikës ka përsëritur thirrjen se «Të mbrosh shtetin me jetë kërkon që edhe shteti të të vlerësojë me dinjitet» dhe ka theksuar se pritet reflektim dhe hapa konkretë nga strukturat përgjegjëse për këtë situatë.