Çfarë u kujton Behluli "analistëve" kosovarë për shqiptarët e Maqedonisë?
Gazetari kosovar akuzon kritikët si "argatë të Ramës" dhe kujton luftimet, dëshmorët e fondet e UCK-së si dëshmi të kontributit maqedono-shqiptar.
PRISHTINË — Gazetari kosovar Mirlind Behluli ka dalë në mbrojtje të shqiptarëve të Maqedonisë së Veriut, pasi disa analistë nga Kosova i ironizan dhe i përçmuan pas protestës shqiptaro-maqedonase në Tiranë. Përmes një postimi publik, Behluli dënoi sulmet si të paditura dhe të motivuara politikisht.
"Shqiptarët e Maqedonisë kanë luftuar me pushkë për Shqipërinë, për Kosovën e krejt në fund për veten. Ka edhe dëshmorë", shkroi Behluli. Ai kujtoi se komuniteti ka kontribuar në fondin 3 për qind të presidentit Ibrahim Rugova dhe drejtpërdrejt në fondet e Ushtrisë Çlirimtare të Kosovës.
Behluli iu referua gjithashtu simbolikës kombëtare në kryeqytetin maqedonas: statujat e Skënderbeut dhe të Hasan Prishtinës qëndrojnë në Shkup si shenjë e lidhjes historike ndërmjet shqiptarëve të rajonit. Shkrimtari Ismail Kadare kishte vlerësuar publikisht vendosjen e monumentit të heroit kombëtar atje.
Gazetari i etiketoi kritikët si "argatë me honorar të Edi Ramës" të cilët "nuk njohin as historinë, as aktualitetin" e shqiptarëve në Maqedoni. Reagimi vjen ndërsa debati mes figurave publike nga Kosova dhe komunitetit shqiptar të Maqedonisë së Veriut është intensifikuar pas protestave të fundit në Tiranë.
Burim: Almakos
— Redaksia ZHURMA