Çfarë i detyroi banorët e Studeniçanit të bllokojnë rrugën e Draçevës?

DRAÇEVË — E mërkura në mesditë mblodhi protestues që bllokuan rrugën në vendbanimin e Draçevës, pikërisht para NP Pyjet e Maqedonisë – njësi “Karaxhica”. Revolta vjen pas një muaji e gjysmë ku rruga mbetet pothuajse e pakalueshme për disa fshatra kodrinorë në periferi të Shkupit.

Drunjtë e prerë për skaj rrugës nuk janë pastruar nga autoriteti kompetent. Banorët thonë se makineritë e rënda ua kanë dëmtuar rrugën e fshatrave, ku tani veturat mezi kalojnë.

“Kemi dalë në protesta për shkak të prerjes së pyjeve dhe rrugën që po na dëmtojnë, e kanë prishur të gjithën”, theksoi Fazli Hetemi, protestues. “Pyjet ne i kemi me dokumente tona, po vijnë e na presin në malet tona. Malet i kemi dem baba dem, jo të sotshme por i kemi trashëguar.”

“Bëhet fjalë për njerëz që 40 km larg Shkupit të mos kenë komunikim me civilizimin”, u shpreh një tjetër protestues. “Së pari, lart s’kemi as rrjet telefonik! Së dyti, ndërtohet hidrocentrali prej disa vitesh dhe këtu ka dëmtime intensive.”

Kryetari i Komunës së Studeniçanit, Ejup Abazi, i vizitoi protestuesit. “Ne si komunë nuk kemi kompetencë ti kontrollojmë Pyjet e Maqedonisë”, deklaroi ai, duke shtuar se do ta adresojmë kërkesën tek institucionet përkatëse që prerjet të bëhen të kontrolluara pa dëme.

Nga NP “Pyjet e Maqedonisë – Karaxhica” thanë se me kërkesë të ARM-së dhe Qendrës për Menaxhim me Kriza është kërkuar pastrimi i degëve për kalim më të lehtë të mjeteve të rënda në raste emergjente. Përgjegjësi Vllatko Gruevski tha se brenda 20 ditësh do të pastrohen mbetjet e degëve në rrugë, pasi të arrijë makineria ndërtuese sipas procedurave të tenderimit.

Protestuesit u shpërndanë pas një ore bllokim, por paralajmëruan se nuk do të heqin dorë derisa të gëzojnë të drejtën për lëvizje të lirë dhe të sigurt. Premtimi i 20 ditëve vjen pasi banorët e kanë mbajtur rrugën të bllokuar fizikisht — një matje e presionit që tregon se komunikimi zyrtar ka dështuar deri tani.

Burim: TV21
— Redaksia ZHURMA