Banka Popullore: Nesër nis tërheqja e mjeteve në Manastir për klientët e ALTA Bankës

Siç raportoi Zhurma më 2 nëntor 2026, Banka Popullore e RMV-së kishte vendosur masa të përkohshme dhe kufizim të tërheqjeve javore për klientët e këtij institucioni financiar pas zhvillimeve në Serbi.

Banka Popullore ka njoftuar se duke filluar nga e enjtja, 5 nëntor 2026, qytetarët që zotërojnë llogari pagese në ALTA Banka AD Bitola por nuk disponojnë kartela pagese, do të kenë mundësi t'i tërheqin mjetet e tyre drejtpërdrejt në sportelet e degës kryesore të vendosur në rrugën “Dobrivoje Radosavljeviç” nr. 21 në Manastir. Ky shërbim u dedikohet posaçërisht pensionistëve dhe përfituesve të ndihmës sociale, ndërsa shuma maksimale e lejuar për tërheqje arrin deri në 20.000 denarë për një periudhë dyjavore.

Për t'i shërbyer sa më shumë klientëve, dega kryesore do të punojë me dy ndërrime duke filluar nga 6 nëntori, përfshirë edhe të shtunën, më 7 nëntor. Tërheqja e mjeteve do të organizohet në bazë të një orari të caktuar, ndërsa qytetarët do të njoftohen paraprakisht me anë të mesazheve SMS për ditën dhe orën e paraqitjes në bankë. Institucioni ka kërkuar nga qytetarët që t'i përmbahen rreptësisht orarit të caktuar për të shmangur tollovitë dhe pritjet e gjata, ndërsa për ata që nuk mund të paraqiten në terminin e caktuar do të sigurohen termine shtesë. Në këto sportele të posaçme do të kryhen vetëm tërheqje të parave të gatshme dhe nuk do të ofrohen shërbime apo transaksione të tjera bankare. Ndërkohë, po bëhen përgatitjet e nevojshme për hapjen e sporteleve të ngjashme për pensionistët dhe përfituesit e ndihmës sociale edhe në qytete të tjera të vendit.