Çmimet e banesave shënojnë rekord në Shkup — 3.360 euro për metër katror
Në Ohër çmimi për apartamentet e përdorura arriti në 3.200 euro, ndërsa tregu i patundshmërive shënoi 8.369 transaksione gjatë periudhës prill–qershor.
SHKUP — Tregu i patundshmërive në Maqedoninë e Veriut ka regjistruar çmime rekorde gjatë tremujorit të dytë të këtij viti, ku një apartament prej 50 metrash katrorë në Komunën Qendër të Shkupit është shitur për 168.000 euro. Sipas Regjistrit të Çmimeve dhe Qirave, ky transaksion kap vlerën prej 3.360 eurosh për metër katror.
Ndërkohë, çmimet më të larta për banesat e përdorura janë shënuar në qytetin e Ohrit, ku metri katror arriti vlerën prej 3.200 eurosh. Regjistri zyrtar tregon se një apartament me hapësirë prej 66 metrash katrorë në këtë zonë turistike u shit për plot 211.200 euro gjatë periudhës prill–qershor.
Ky fluks çmimesh reflekton një rritje të përgjithshme të aktivitetit në tregun e patundshmërive, me gjithsej 8.369 transaksione të regjistruara, ose 7,9% më shumë se në tremujorin paraprak. Vlera financiare e këtij tregu kapi shifrën e 351,7 milionë eurove, duke shënuar një kërcim prej 27,3%.
Komuna e Aerodromit ka prirë për nga numri i banesave të shitura met 297 njësi, ndërsa në Manastir u shitën më së shumti shtëpi. Ndërkohë, Agjencia e Kadastrës ka regjistruar mbi 28.000 fletë për pararegjistrim të objekteve në ndërtim, çka paralajmëron ardhjen e shpejtë të apartamenteve të reja në treg.
Kjo tendencë rritëse vërteton se kërkesa për patundshmëri po vazhdon të mbetet e lartë, pavarësisht çmimeve rekorde që po sfidojnë fuqinë blerëse të qytetarëve.
Burim: Tetova Sot
— Redaksia ZHURMA