Bajrami: Qeveria Kurti s’e përfundoi asnjë projekt të madh kapital

Deputetja e Lidhjes Demokratike të Kosovës, Hykmete Bajrami, ka deklaruar se Qeveria Kurti nuk ka përfunduar asnjë projekt të madh kapital pas gjashtë vitesh qeverisjeje dhe miliarda eurove buxhet. Bajrami bëri me dije se deri në fund të shtatorit 2026 janë realizuar vetëm 376.85 milionë euro nga 998.4 milionë euro të planifikuara për investime kapitale.

Sipas Raportit Nëntëmujor Financiar të Ministrisë së Financave, realizimi prej 376.85 milionë eurosh përbën vetëm rreth 37 për qind të buxhetit vjetor të planifikuar për investime kapitale. Gjatë kësaj periudhe janë shpenzuar 12.36 milionë euro më pak se në të njëjtën kohë të vitit 2025. Po ashtu, vetëm gjatë periudhës 2021–2024 janë realizuar rreth një miliard euro më pak investime kapitale sesa ishin planifikuar fillimisht sipas të dhënave buxhetore.

Bajrami theksoi se nga shuma prej 376.85 milionë eurosh e regjistruar si shpenzim kapital, 82.11 milionë euro janë shkuar për pagesa të vendimeve gjyqësore. Deputetja e LDK-së numëroi disa me akse rrugore që vazhdojnë të mbesin të papërfunduara, duke përmendur rrugët Prishtinë – Podujevë, Prishtinë – Gjilan, Prishtinë – Mitrovicë, Kijevë – Zahaq si dhe Dollc – Gjakovë. Ajo shtoi se disa prej këtyre projekteve infrastrukturore kanë nisur para dhjetë vitesh. Bajrami deklaroi gjithashtu se gjatë kësaj periudhe qeverisëse janë lidhur 2913 kontrata njëburimore dhe se dështimet janë rezultat i keqplanifikimit, vonesave në prokurim, keqmenaxhimit dhe korrupsionit endemik.

Për vitin 2027, Qeveria ka planifikuar 1.07 miliardë euro për investime kapitale, prej të cilave vetëm rreth 247 milionë euro janë ndarë për të gjitha komunat. Në projektbuxhetin e vitit 2027 figurojnë 23 çerdhe me buxhet zero euro. Gjithashtu, për projektin e Rrugës Duhël – Banullë prej 26 milionë eurosh nuk është ndarë asnjë euro për vitin 2027. Për Unazën e Prishtinës prej 61 milionë eurosh janë ndarë vetëm 1 milion euro, apo 1.6 për qind e vlerës, ndërsa për Rrugën e Dukagjinit prej 31 milionë eurosh është ndarë po ashtu vetëm 1 milion euro. Për ndërtimin e pesë digave me vlerë mbi 400 milionë euro janë alokuar 1.5 milionë euro, kurse për Institutin për Trajtimin e Sëmundjeve të Varësisë prej 1.7 milionë eurosh janë ndarë vetëm 50 mijë euro.

Deputetja Hykmete Bajrami deklaroi se Kosova ka nevojë për investime konkrete dhe jo për propagandë, duke thënë se «propaganda mund t’i zmadhojë shifrat herë me deklarata e herë në letër, por nuk mund t’i ndërtojë rrugët, shkollat, çerdhet as spitalet». Ajo vlerësoi se investimet në rrugë, hekurudha, shkolla e spitale ndihmojnë në krijimin e vendeve të punës dhe mbështetjen e bizneseve vendore.