Qeveria nxjerr në ankand veturat zyrtare jashtë përdorimit

Qeveria e Kosovës ka miratuar vendimin për shitjen e automjeteve zyrtare jashtë përdorimit përmes ankandit publik. Kryeministri Albin Kurti ka nënshkruar vendimin që autorizon Ministrinë për Komunitete dhe Kthim të procedojë me shitjen përmes ankandit, duke u mbështetur në legjislacionin në fuqi. Përveç kësaj, Ministria e Digjitalizimit dhe Administratës Publike është detyruar të zhvillojë procedurat për shitjen përmes ankandit publik. Vendimi përfshin edhe një listë të automjeteve jashtë përdorimit që i përkasin Ministrisë për Komunitete dhe Kthim. Ky vendim është marrë katër ditë më parë dhe mban firmën e kryeministrit Kurti.