AUV ndalon suxhukun e BUQUKU-t pasi zbulohet ADN e pulës në produkt

Agjencia e Ushqimit dhe Veterinarisë ka urdhëruar masa kufizuese dhe ndalimin e prodhimit e të shpërndarjes ndaj kompanisë BUQUKU SH.P.K. në Pejë, pasi në produktin e saj është gjetur prania e ADN-së së pulës ndonëse deklarohej vetëm me mish dhe yndyrë lope, ndërsa gjithsej 178 kilogramë produkte janë bllokuar nga inspektorët pas rezultateve të laboratorit ALIMENTI-OMNILAB në Bullgari. Sipas njoftimit të AUV-së, mostra e marrë nga inspektorët konfirmoi praninë e ADN-së së gjedhit dhe pulës, ndërsa ADN-ja e derrit nuk u detektua gjatë analizave laboratorike.

Sipas sqarimeve nga AUV, analiza konfirmon praninë e materialit nga pula, por nuk përcakton sasinë, llojin apo burimin e saktë të përdorur, çka do të kërkojë verifikime të mëtejshme për të kuptuar nëse është përdorur mish pule i ndarë mekanikisht apo përbërës të tjerë. Pas pranimit të këtyre rezultateve, inspektorët kryen një kontroll zyrtar te operatori ekonomik, ku bllokuan 120 kilogramë suxhuk “Kalorik” dhe 58 kilogramë suxhuk shtëpiak, krahas urdhrit për tërheqjen e tyre nga pikat e shpërndarjes.

Agjencia ka theksuar se gjetja laboratorike i referohet vetëm produktit “Suxhuk shtëpiak” të testuar dhe nuk nënkupton se e njëjta mospërputhje ekziston te produktet e tjera të ndërmarrjes. Megjithatë, sipas AUV-së, operatorët mbajnë përgjegjësinë për deklarimin e saktë të përbërjes dhe respektimin e rregullave të sigurisë ushqimore.

Në kuadër të veprimeve të mëtejshme, AUV bëri të ditur se do t'i zgjerojë kontrollet te ky operator për të verifikuar gjurmueshmërinë e lëndëve të para, kushtet e ruajtjes, procesin e prodhimit, si dhe dokumentacionin e furnizimit dhe regjistrat e prodhimit. Agjencia do të ndërmarrë masat përkatëse administrative dhe do ta informojë publikun për gjetjet e reja të kontrolleve.