Kriza ekonomike te «Pastërtia»: Punëtorët pa rroga, ujë e rrymë

Kompania Regjionale e Mbeturinave «Pastërtia», e cila operon në Ferizaj, Shtime dhe Kaçanik, po përballet me një krizë të rëndë ekonomike që ka lënë punëtorët pa paga në afat, si dhe pa energji elektrike e ujë në objekte pune. Sipas kryetarit të sindikatës, Skender Sahiti, kjo gjendje ka ardhur si pasojë e rritjes së çmimit të naftës që ka dëmtuar financat, ndërsa vetëm 6 kamionë janë në dispozicion për të mbuluar tri komunat.

Kriza ekonomike e kompanisë është pranuar nga drejtori ekzekutiv Basri Syla, i cili megjithatë ka mohuar të ketë pasur vonesa pagash për punëtorët fizikë. Sipas Sylës, kompania ka kërkuar nga komuna rritjen e tarifës së pagesës, e cila tashmë është votuar nga Kuvendi Komunal, ndërsa çështja e tenderit për servisim të kamionëve ka shkuar në Organin Shqyrtues të Prokurimit (OShP).

Sipas kryetarit të sindikatës, Skender Sahiti, vonesat e pagave deri në fund të muajit kanë demotivuar punëtorët, të cilët janë kryefamiljarë dhe kanë obligime bankare. Sahiti shtoi se në objektin e punëtorëve në Shtime mungon uji dhe për disa kohë nuk ka pasur as rrymë, duke i detyruar punëtorët që të blejnë ujë ose ta marrin nga shtëpia për të pastruar duart pas kontaktit me mbeturina, ndërsa komuna u ka premtuar ndërtimin e një objekti të ri.

Lidhur me mungesën e kamionëve në punë, kryetari i sindikatës Sahiti deklaroi se garazhet janë plot me mjete që qëndrojnë me muaj të tërë në defekt për shkak të mungesës së një kompanie të kontraktuar servisi. Nga ana e tij, drejtori ekzekutiv Basri Syla u shpreh se mungesa e servisimit të kamionëve është shumë problematike, por pasi çështja tenderuese ndodhet në OShP, kompania po pret vendimin.

Përtej problemeve me flotën e mjetet dhe kushtet sanitare, drejtori Syla dha shpjegime edhe rreth ankesave të punëtorëve të administratës për pagat, duke siguruar se drejtoria po punon për t'i tejkaluar shpejt të gjitha sfidat financiare dhe administrative me të cilat po ballafaqohet ndërmarrja.