Asetet e fondeve pensionale në RMV arrijnë në 3.5 miliardë euro

Deri në fund të shtatorit, tri shoqëritë private që menaxhojnë fondet e pensioneve në Maqedoni regjistruan asete neto në vlerë prej 215.1 miliardë denarë, shifër që llogaritet në afërsisht 3.5 miliardë euro. Statistikat e publikuara nga Agjencia për Mbikëqyrjen e Sigurimit të Pensioneve të Financuara Plotësisht tregojnë një rritje prej 1.3 përqind në krahasim me muajin e kaluar, ndërkohë që numri i të anëtarësuarve arrin në 642.652 persona.

Pjesën më të madhe të mjeteve e administron kompania «KB Prvo» me 103.2 miliardë denarë, e ndjekur nga «Sava» që menaxhon 91.2 miliardë denarë dhe «Triglav» me 20.8 miliardë denarë. Këto kursime të shtyllës së dytë grumbullohen në llogari individuale dhe investohen për të siguruar të ardhura për pensionin e ardhshëm, ndërkohë që shuma përfundimtare për secilin të siguruar varet nga koha e sigurimit dhe fitimet e realizuara.

Zhvillimet vijnë në një kohë kur po rihapet debati për qëndrueshmërinë e sistemit pensional, pasi kryeministri Hristijan Mickoski më herët përmendi mundësinë e nacionalizimit të aseteve të shtyllës së dytë. Shoqata e Shoqërive të Menaxhimit të Fondeve të Pensioneve ka reaguar duke vlerësuar se një masë e tillë nuk do të ishte zgjidhje afatgjatë, duke theksuar se paratë janë pronë individuale e të siguruarve dhe mund t'u kalojnë trashëgimtarëve pas vdekjes, ndërsa transferimi i tyre në fondin shtetëror të pensioneve do të sillte vetëm lehtësim të përkohshëm.