Kate Moss shfaqet në Londër teksa motra flet për raportin e ftohtë

Supermodelja e njohur britanike është parë duke shijuar një drekë e vetme në ambientet e jashtme të një restoranti në veri të kryeqytetit britanik. Gjatë kësaj daljeje publike, ajo ka rënë në sy për stilin e saj të veçantë, teksa është fotografuar duke shfletuar një revistë, duke mbajtur dy cigare elektronike dhe duke biseduar në telefon, e veshur me xhaketë të zezë, xhinse dhe aksesorë luksozë.

Në rrafshin familjar, ndërkaq, marrëdhënia e saj me motrën më të vogël është kthyer sërish në qendër të vëmendjes mediatike. Kjo e fundit ka folur hapur gjatë një paraqitjeje në një podkast, duke pranuar se raporti mes tyre është pothuajse inekzistent dhe se gjatë viteve të fëmijërisë është ndier e lënduar nga mungesa e vëmendjes. Ajo ka shtuar se kjo çështje mbetet mjaft e ndërlikuar, duke theksuar se nuk dëshiron ta mërzisë Kate.