Gashani: Alarmi i Ramës për Lojërat Mesdhetare është i pabazë

Ministri i Sportit dhe Rinisë, Blerim Gashani, ka reaguar ndaj deklaratave të kryetarit të Prishtinës, Përparim Rama, i cili paralajmëroi se Kosova rrezikon ta humbasë organizimin e Lojërave Mesdhetare 2030. Rama kishte publikuar një letër të Komitetit Ndërkombëtar të Lojërave Mesdhetare (ICMG) duke pretenduar se institucionet qendrore nuk kanë dhënë përgjigjet e nevojshme dhe se vendi rrezikon ta humbasë një mundësi historike për shkak të mungesës së përgjigjes institucionale nga kryeministri Albin Kurti.

Gashani e ka cilësuar publikimin e kësaj korrespondence si dramaticitet të panevojshëm dhe alarm pa bazë, duke thënë se përkushtimi i Qeverisë për organizimin e këtij eventi mbetet i plotë dhe se ekzekutivi po vazhdon punën me përgjegjësi dhe në bashkëpunim me ICMG-në. Ai gjithashtu ka kritikuar qasjen e kryetarit të Prishtinës, duke thënë se letra nuk është për publikime e teatralitet në rrjetet sociale, por për trajtimin e çështjeve mes institucioneve partnere.