Arrestohet në Bullgari 19-vjeçari nga Shkupi me kartëmonedha të falsifikuara

SHKUP — Policia bullgare ka arrestuar 19-vjeçarin Hamza Dardhishta nga Shkupi në pikën kufitare Kapitan Andreevo, pasi i gjeti 685 kartëmonedha të falsifikuara prej 100 dhe 200 eurosh, me vlerë totale prej 98.500 deri në 100 mijë euro. Gjykata ka vendosur caktimin e masës së paraburgimit ndaj të riut.

Sipas autoriteteve, i dyshuari kishte hyrë për një periudhë të shkurtër në Turqi, nga ku kishte udhëtuar drejt pikës kufitare. Gjatë kontrollit nga policia bullgare në kufi, ai po transportonte prerjet e falsifikuara të parave të fshehura në automjet. Gjatë këtij procesi verifikues, zyrtarët kufitarë vërejtën sjelljen e tij të dyshimtë, çka çoi në kontrollin më të detajuar të xhaketës së tij.

Nga prokuroria kanë bërë të ditur se kartëmonedhat e falsifikuara ishin qepur drejtpërdrejt në astarin e xhaketës që i riu kishte veshur gjatë kalimit kufitar. Sipas zyrtarëve hetimorë, gjatë kontrollit në kufi i dyshuari duket se ishte i shqetësuar, mbështetej fort pas sediljes së automjetit dhe shikonte vazhdimisht drejt tavanit të makinës. Pas arrestimit, policia i sekuestroi telefonin celular, ku hetuesit zbuluan një numër të konsiderueshëm fotografish të kartëmonedhave të ngjashme të falsifikuara, të realizuara më herët gjatë këtij viti, në disa prej të cilave shfaqej edhe vetë 19-vjeçari.

Gjatë procesit gjyqësor, mbrojtja dhe avokati i tij kërkuan një masë më të butë sigurie, konkretisht garanci financiare. Avokati u bazua në argumentin se i riu nuk kishte precedentë penalë të mëparshëm dhe është në moshë të re. Megjithatë, gjykata e refuzoi këtë kërkesë dhe vendosi ta mbajë në paraburgim, për shkak të dyshimit të bazuar se ai ka kryer veprën penale dhe për shkak të rrezikut të arratisjes.

Para hetuesisë, i dyshuari Hamza Dardhishta ka deklaruar se nuk e dinte që kartëmonedhat e gjetura në xhaketën e tij ishin të falsifikuara.