Kush është Armand Shakaj, i dyshuari për vrasjen e Eglant Koçit?
Pse policia e Tiranës nuk e ka gjetur ende 41-vjeçarin që dyshohet se vrau mikun e tij para 12 ditësh?
TIRANË — Eglant Koçi, 34 vjeç, mbetet i zhdukur pa gjurmë prej 12 ditësh. Policia e Tiranës deklaroi pak ditë pas zhdukjes se të riu dyshohet se është vruarë nga miku i tij, Armand Shakaj, 41 vjeç.
Shakaj vijon të jetë në kërkim. Për arrestimin e tij janë angazhuar Policia e Tiranës dhe struktura të tjera policore, me kërkime të shtrira në të gjithë vendin. Hetuesit përdorin metoda speciale për ta vënë në pranga.
Arrestimi i Shakajt do t'i hapte rrugë gjetjes së trupit të Koçit, i cili dyshohet se është fshehur në periferi të Tiranës. Kontrollet në fshatra, qytete, terrene malore dhe zona të pyllëzuara nuk kanë dhënë rezultat.
Sipas burimeve policore, Shakaj fshihet brenda territorit të Shqipërisë dhe ka ndryshuar pothuajse tërësisht pamjen. Ai ka prerë flokët, ka hequr mjekrën dhe përdor forma maskimi gjatë lëvizjeve. Hetuesit dyshojnë se mban kontakte me persona të afërt që e ndihmojnë të fshihet.
41-vjeçari ka ndryshuar numrin e telefonit dhe pajisjen për të shmangur gjurmimin. Dyshohet se ushtronte aktivitet të paligjshëm në fushën e call centerave dhe zotëronte karta SIM me numra të huaj, të cilat mund t'i përdorë për të shmangur identifikimin.
Burim: Klan Kosova
— Redaksia ZHURMA