Gjendet i vdekur 34-vjeçari Arianit Çetaj në Pejë
Djali i rapsodit Hasan Çetaj u gjet nga familjarët në tarracën e shtëpisë, ndërsa prokuroria ka nisur hetimet për zbardhjen e rrethanave të vdekjes.
PEJË — Arianit Çetaj, 34-vjeçar, është gjetur pa shenja jete paraditen e së enjtes në shtëpinë e familjes së tij në Pejë. Trupi i të ndjerit, i cili është djali i rapsodit të njohur Hasan Çetaj, u zbulua rreth orës 09:30 nga babai dhe vëllai i tij në tarracën e shtëpisë në rrugën “Vëllazëria Dalemani”.
Sipas raportimeve të gazetës Epoka e Re dhe portalit Sinjali, vetëm pak orë para tragjedisë, 34-vjeçari kishte qenë së bashku me familjarët në një dasmë në Prizren. Ata ishin kthyer në shtëpi rreth orës 04:00 të mëngjesit për të pushuar, ndërsa më vonë ai u gjet i përkulur mbi një divan.
Pas njoftimit, në vendin e ngjarjes kanë dalë njësitë e Policisë së Kosovës dhe prokurori kujdestar, i cili ka urdhëruar dërgimin e trupit në Institutin e Mjekësisë Ligjore për obduksion. Hetuesit policorë kanë nisur procedurat e rastit të cilësuar si “hetim i vdekjes” për të zbardhur shkaqet e sakta të kësaj tragjedie.
Burim: Epoka e Re
— Redaksia ZHURMA
