Antologjia "Diell në sytë e saj" përmbledh 153 poetë shqiptarë

Libri "Diell në sytë e saj" (Antologji e poezisë shqipe për gruan), i poetit dhe ligjëruesit universitar Profesor Dr. Merxhan Avdylit, përmbledh poezitë e 153 poetëve brenda 460 faqeve. Vepra, e botuar nga EMBETA në Prishtinë, përfshin dy vështrime hyrëse: njërin nga recensenti Profesor Dr. Bajram Kosumi dhe tjetrin si fjalë hyrëse nga hartuesi i saj.

Në shkrimin e tij "Gruaja e munguar", studiuesi Kosumi ngre pikëpamje për mënyrat e trajtimit poetik-artistik të gruas në poezinë shqipe. Sipas tij, "Gruaja ka qenë mysafire në poezinë shqipe të traditës". Ai analizon poezinë "e hapur romantike", ku himnizimi i bukurisë "rri pezull midis materies dhe idesë, midis një gruaje konkrete dhe një imagjinare, midis gruas së bukur dhe bukurisë estetike".

Kosumi i atribuon poetit Naim Frashëri sintezën e bukurisë eterike, ndërsa te Lasgush Poradeci vëren një qasje të ngjashme, me dallimin se dashuria "rri ndërmjet tokësores dhe kozmikes, ndërmjet konkretes e imagjinatës". Ai përmend se në gjysmën e dytë të shekullit njëzet, "gruaja zë herë pas herë fronin e mbretëreshës".