Arrestohen dy 26-vjeçarë për vjedhje në Pogradec dhe Korçë

POGRADEC — Policia e Pogradecit, në bashkëpunim me shërbimet e Komisariatit të Policisë Korçë, ka vënë në pranga dy persona 26-vjeçarë, të identifikuar si Ronaldo Mehmeti dhe Romeo Memetali, të dyshuar për një seri vjedhjesh të kryera në biznese dhe automjete në dy qytetet e vendit.

Operacioni policor i koduar «Qarku» është zhvilluar në kuadër të punës për identifikimin e autorëve dhe zbardhjen e ngjarjeve kriminale, duke çuar në dokumentimin e gjashtë rasteve të vjedhjeve në total. Sipas njoftimit zyrtar të uniformave blu, gjatë hetimeve rezultoi se të dyshuarit kishin shënjestruar pesë biznese të ndryshme, si dhe kishin marrë sende me vlerë nga një automjet në zonë.

Gjatë kontrolleve të ushtruara në banesat e të arrestuarve, të cilët janë me banim në fshatin Drenovë dhe në Korçë, grupi hetimor ka gjetur dhe sekuestruar në cilësinë e provës materiale sendet e dyshuara të vjedhura, një shumë parash, si dhe automjetin që dyshohet se ata e përdornin për të lëvizur gjatë kryerjes së veprimtarisë kriminale.

Në vijim të hetimeve, shërbimet e policisë kanë arritur të identifikojnë edhe një person të tretë të përfshirë në këtë ngjarje, shtetasin E. Ll., banues në Kamëz, i cili është shpallur në kërkim ndërkohë që vijojnë veprimet intensive për lokalizimin dhe kapjen e tij nga autoritetet.

Në bashkëpunim të ngushtë me Prokurorinë, po punohet vazhdimisht për dokumentimin ligjor edhe të rasteve të tjera të mundshme të vjedhjeve që mund të jenë kryer nga këta shtetas. Materialet procedurale i janë dërguar Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprën penale «Vjedhja», e kryer në bashkëpunim më shumë se një herë.