Çfarë përmban strategjia pesëvjeçare antikorrupsion që KSHPK-ja i dorëzoi Afrim Gashit?
Komisioni Antikorrupsion prezanton planin pesëvjeçar me fokus në sektorët më të rrezikuar si drejtësia e prokurimet, me kosto rreth 3.5 milionë euro.
SHKUP — Komisioni Shtetëror për Parandalimin e Korrupsionit (KSHPK) i ka dorëzuar zyrtarisht kryetarit të Kuvendit, Afrim Gashi, Strategjinë e re Nacionale për Parandalimin e Korrupsionit për periudhën pesëvjeçare 2026–2030. Ky dokument strategjik synon të adresojë drejtpërdrejt pikat më të nxehta të korrupsionit në vend.
Sipas kryetarit të KSHPK-së, Adem Çuçul, fokusi i pesë viteve të ardhshme do të përqendrohet te prokurimet publike dhe mbikëqyrja e zbatimit të ligjit. Sektorët kyç të shënjestruar përfshijnë drejtësinë, transportin, projektet infrastrukturore, planifikimin urban e ndërtimtarinë, shëndetësinë, mjedisin jetësor, energjetikën si dhe menaxhimin e burimeve natyrore.
Çuçul theksoi se komisioni u fokusua në këta sektorë specifikë sepse suksesi në këto fusha do të ketë efekt vendimtar në zhvillimin e përgjithshëm të shoqërisë. Nga ana tjetër, kryeparlamentari Gashi premtoi se do t'ua dorëzojë dokumentin menjëherë deputetëve, me shpresën për një miratim të shpejtë në seancë plenare.
Antikorrupsioni pret gjithashtu miratimin e ndryshimeve në Ligjin për parandalimin e korrupsionit dhe konfliktit të interesit, nismë kjo që ndodhet aktualisht në procedurë qeveritare. Këto ndryshime ligjore pritet të rrisin ndjeshëm sanksionet ndaj funksionarëve publikë që nuk e deklarojnë saktë pasurinë e tyre sipas kërkesave ligjore.
Niveli i ulët i sanksioneve ekzistuese u detektua si problematikë edhe nga raporti i GRECO-s. Ndryshimet e reja parashikojnë dyfishim të sanksioneve dhe futjen e mekanizmave shtesë, si verifikimi i hollësishëm pasuror dhe hapja e procedurave hetimore për zyrtarët që shpërfillin detyrimin për deklarimin e pasurisë së tyre.
Për zbatimin e kësaj strategjie nacionale do të nevojiten të paktën 3.5 milionë euro, shumë kjo e llogaritur me ndihmën e ekspertëve. Megjithatë, drejtuesit e KSHPK-së theksojnë se ky investim është minimal në krahasim me përfitimet e mëdha dhe kursimet që do të ketë buxheti i shtetit nga frenimi i korrupsionit.
Burim: TV21
— Redaksia ZHURMA
