Si u shfaq rasti i parë me virusin Zika në Maqedoni?
Një shtetas i Maqedonisë së Veriut është konfirmuar pozitiv me virusin Zika pasi u pickua nga një mushkonjë gjatë pushimeve të tij në Maldive.
SHKUP — Instituti i Shëndetit Publik ka regjistruar zyrtarisht rastin e parë të infektimit me virusin Zika në Maqedoninë e Veriut. Bëhet fjalë për një shtetas të vendit, i cili është prekur nga ky virus pas një pickimi nga mushkonjat gjatë kohës që po kalonte pushimet e tij në ishujt Maldive.
Sipas njoftimit zyrtar nga ISHP, pacienti ka qëndruar në Maldive nga data 20 deri më 28 maj, periudhë gjatë së cilës ai ka raportuar pickime të shpeshta. Menjëherë pas kthimit në shtëpi, ai është paraqitur për kontroll mjekësor në Klinikën për Sëmundje Infektive për shkak të shqetësimeve.
Më 17 qershor, Departamenti i Virologjisë pranë institutit konfirmoi rezultatin pozitiv të testit. Pas kësaj, epidemiologët kontaktuan pacientin dhe ndërmorën masat e nevojshme parandaluese, duke kryer anketa epidemiologjike, dezinfektim të zonës përreth shtëpisë së tij dhe duke dhënë udhëzime për të shmangur transmetimin seksual të virusit.
Nga ISHP gjithashtu këshillojnë qytetarët që të jenë vigjilentë ndaj simptomave si ethe ose skuqje të lëkurës pas udhëtimeve jashtë vendit dhe të kërkojnë ndihmë të menjëhershme mjekësore nëse shfaqin çrregullime neurologjike.
Burim: Insajderi
— Redaksia ZHURMA