Shasivari: Në tetor takim për provimin e jurisprudencës në gjuhën shqipe
Ministri i Drejtësisë, Jeton Shasivari, njoftoi se në pjesën e parë të tetorit do të organizojë takim me studentët dhe dekanët për të prezantuar zgjidhjen për provimin e…
Ministri i Drejtësisë, Jeton Shasivari, ka paralajmëruar se në pjesën e parë të tetorit do të mbahet një takim konsultativ dhe informues me përfaqësues të asociacioneve studentore dhe dekanë të fakulteteve juridike, ku do të prezantohet dhe demonstrohet praktikisht zgjidhja e propozuar për provimin e jurisprudencës. Ai ka premtuar se do të gjendet zgjidhje që provimi të mbahet në gjuhën shqipe.
Shasivari ka bërë të ditur se takimi do të zhvillohet pasi të fillojë viti i ri akademik, duke theksuar se tani është koha e regjistrimeve në universitete. Ai ka shprehur besimin se ftesat për takim do t’u dërgohen së shpejti pjesëmarrësve. Nëpërmjet dialogut dhe partneritetit me asociacionet studentore, synohet që studentëve t’u shpjegohet konkretisht se si do të funksionojë zgjidhja e propozuar.
Gjatë një deklarate për mediat, pas sesionit NKEU-MK, i cili trajtoi kontributin e dialogut të strukturuar në rrugëtimin evropian të Maqedonisë së Veriut, Shasivari ka njoftuar se deri më tani janë paraqitur pesë kërkesa nga po aq shoqata studentore. Sipas tij, tre prej tyre e kërkojnë provimin në gjuhën shqipe, një në anglisht dhe një tjetër si në anglisht ashtu edhe në turqisht. Ministri ka nënvizuar se këto pesë institucione ofrojnë programe juridike për ciklin e parë dhe të dytë në gjuhët e përmendura, përveç asaj maqedonase.
Shasivari ka theksuar se respektimi i standardeve ndërkombëtare dhe evropiane është thelbësor për një qasje sa më përfshirëse. Ai ka shtuar se pas konsultimeve do të ndërmerren hapa të mëtejshëm institucionalë. Takimi pritet të mbahet në pjesën e parë të tetorit, pasi të nisë viti i ri akademik.