Si pretendon Izet Mexhiti se VLEN mori 'hisen' e shqiptarëve?
Bashkëkryetari i VLEN-it thotë se gjatë dy viteve janë ndarë mbi 3 miliardë euro për projekte konkrete në vendbanimet shqiptare.
SHKUP — Bashkëkryetari i koalicionit VLEN, Izet Mexhiti, deklaroi se në këto dy vite si partnerë në qeveri kanë marrë hisen që u takon shqiptarëve në Maqedoninë e Veriut. Gjatë një interviste për Alsat-M, ai theksoi se ky kontribut vërehet me shifra dhe numra konkretë.
Sipas Mexhitit, mbi 3 miliardë euro janë ndarë për vendbanimet shqiptare duke filluar nga projektet e rëndësishme si Korridori 8 dhe Rruga Shkup-Bllacë. Ai gjithashtu përmendi Universitetin 'Nënë Tereza' dhe Sheshin Skënderbe, krahas mbi 100 milionë eurove të ndara për komunat shqiptare.
Bashkëkryetari i koalicionit këmbëngul se këto projekte tashmë po realizohen dhe nuk mbeten vetëm në letër. Sipas tij, flitet ekskluzivisht për investime dhe numra konkretë, ku dëshmia kryesore e këtij realizimi të vazhdueshëm janë vetë qytetarët.
Burim: Almakos
— Redaksia ZHURMA