Ambasada Amerikane: Protestat mund të përshkallëzohen pa paralajmërim

PRISHTINË — Përfaqësia diplomatike e Shteteve të Bashkuara në Prishtinë lëshoi një njoftim për shtetasit e saj, duke paralajmëruar se grumbullimet dhe protestat pritet të vazhdojnë në kryeqytet gjatë javëve në vijim. Njoftimi vjen ndërkohë që në opinionin publik nuk ka ndonjë protestë të madhe të paralajmëruar me datë dhe organizatorë të qartë, duke ngritur pyetje mbi burimin e vlerësimeve të sigurisë.

Në njoftimin e lëshuar të enjten, më 12 nëntor, Ambasada thotë se tubimet pritet të mblidhen fillimisht në qendër të qytetit dhe mund të zgjerohen në zonat përreth. Sipas njoftimit diplomatik, protestat mund të nisin në mënyrë paqësore, por të përshkallëzohen pa paralajmërim, duke shkaktuar pengesa në qarkullim, mbyllje të rrugëve dhe ndërprerje të shërbimeve. Ky zhvillim ndodh në një periudhë debatesh të ndjeshme politike dhe institucionale në vend, përfshirë diskutimet për ndryshimet në legjislacionin që lidhet me Dhomat e Specializuara, megjithëse Ambasada nuk ka bërë ndonjë lidhje të drejtpërdrejtë mes këtyre ngjarjeve dhe paralajmërimit për sigurinë.