Sa investoi Maqedonia në modernizimin e Spitalit të Strumicës?

STRUMICË — Ministri i Shëndetësisë, Azir Aliu, së bashku me Kryeministrin Hristijan Mickoski, vizituan sot Spitalin e Përgjithshëm në Strumicë, me rastin e përfundimit të plotë të projektit për rikonstruktimin dhe adaptimin e kësaj institucioni. Kushtet për trajtimin e pacientëve janë përmirësuar ndjeshëm në një nga institucionet më të rëndësishme shëndetësore rajonale në vend.

Vlera e përgjithshme e investimit arrin në 279.3 milionë denarë. Projekti përfshiu ndërhyrje të gjera ndërtimore, infrastrukturore dhe teknike për modernizimin e kapaciteteve spitalore. Me këtë investim, spitali fitoi kushte moderne për funksionim dhe forcoi kapacitetin e tij si qendër rajonale shëndetësore për më shumë se 200.000 banorë nga Strumica, Radovishi, Vallandova, Bosillova, Vasileva, Novo Sella dhe komunat përreth.

"Për këtë institucion kemi siguruar edhe pajisje të reja mjekësore të teknologjisë më të avancuar – tomograf kompjuterik në vlerë prej 43.5 milionë denarësh", theksoi ministri Aliu. Gjatë periudhës së kaluar janë realizuar edhe 55 punësime të reja me qëllim forcimin e kapaciteteve kadrovike. Investimet në infrastrukturën spitalore mbeten një nga prioritetet kryesore të Ministrisë së Shëndetësisë.

Ky investim do të mundësojë mbrojtje shëndetësore më cilësore dhe qasje më të shpejtë në shërbimet shëndetësore për qytetarët e rajonit, të cilat do t'i marrin më afër vendbanimit të tyre. Forcimi i qendrave rajonale si Strumica tregon një qasje që synon të zvogëlojë presionin mbi spitalet qendrore në Shkup.

Burim: Tetova Sot
— Redaksia ZHURMA