Alibeaj: Përplasja e protestuesve me militantët e Berishës shënon garë për opozitën

TIRANË — Ndërsa më herët opozita ftoi qytetarët t'i bashkoheshin tubimit të studentëve, zhvillimet e fundit kanë sjellë një distancim të ri politik. Përplasja mes të rinjve protestues dhe militantëve të Partisë Demokratike para Ministrisë së Arsimit ka nxjerrë në pah ndarjen mes opozitës së vjetër dhe asaj që po lind, sipas ish-deputetit Enkelejd Alibeaj. I ftuar në Report Tv, ai u shpreh se kjo përçarje mund të reflektohet në zgjedhjet lokale të 9 majit, ku opozita rrezikon të përfaqësohet me dy kandidatë për Bashkinë e Tiranës.

Alibeaj theksoi se qytetarët e zhgënjyer nga Sali Berisha nuk përbëjnë një turmë që do të vazhdojë në mënyrë të verbër pas fatit personal të një individi, ndërsa shtoi se protesta duhet të ruajë distancën si nga Edi Rama, ashtu edhe nga Berisha. «Akti i vetëm që do t'i kthente ata në llogore, e dini kush do të ishte apo jo? Që protesta të identifikohej me Berishën. Dhe kjo është loja që bën Rama», u shpreh ai. Sipas tij, të rinjtë duhet të strukturohen politikisht dhe të mendojnë seriozisht për prezantimin e tyre në zgjedhjet e ardhshme, duke sinjalizuar nisjen e një gare se kush do të jetë opozita.