Çfarë tha Ahmeti në Kuvendin Zgjedhor të BDI-së?
Kryetari i BDI-së kritikoi opozitën shqiptare për mungesë legjitimiteti dhe njoftoi ndryshime në udhëheqjen e partisë.
KUMANOVË — Ali Ahmeti deklaroi se dy vitet e fundit kanë shërbyer si periudhë reflektimi për shqiptarët në Maqedoninë e Veriut. Në Kuvendin Zgjedhor të BDI-së në Kumanovë, ai tha se shqiptarët po krahasojnë qeverisjen e kaluar me atë aktuale, duke vlerësuar se ndryshimet e premtuara nga opozita kanë dështuar.
Ahmeti kritikoi përfaqësuesit shqiptarë në qeveri, duke thënë se premtimet për ndryshim kanë sjellë rezultate negative. "Unë jam shumë i sigurt se gjërat nuk do shkojnë kështu", tha ai, duke shtuar se kundërshtarëve u mungon legjitimiteti i popullit dhe se vështirë do të mbijetojnë në skenën politike aq më tepër për të konkurruar me BDI-në.
Ai e cilësoi BDI-në si partinë më të organizuar në vend dhe në rajon, duke theksuar se udhëheqja e saj është rinovuar 83 për qind për t'i lënë vend gjeneratave të reja. Ahmeti përmendi Sadullah Durakun, i cili do të marrë drejtimin e komitetit të veteranëve, si shembull i ndryshimeve brenda strukturave.
"Edhe unë vetë nuk do të jem gjithmonë kryetar, por do të bëhem veteran", tha Ahmeti. Ai nënvizoi se askush nuk mund të jetë përfaqësues i denjë pa legjitimitet dhe se shteti ka nevojë për reflektim, duke larguar qasjen se ai u përket vetëm maqedonasve — shteti është i të gjithë qytetarëve dhe këtë e garanton Marrëveshja e Ohrit.
Ahmeti foli në një kohë kur BDI-ja kërkon të riafirmojë udhëheqjen e saj politike ndër shqiptarët e Maqedonisë së Veriut, duke u distancuar nga partnerët e koalicionit qeverisës, të cilët i konsideron pa legjitimitet.
Burim: Tetova Sot
— Redaksia ZHURMA