Kush janë 6 personat e aktakuzuar për trafikim droge në Suharekë?

— Prokuroria Themelore në Prizren, përmes Departamentit të Krimeve të Rënda, ka ngritur aktakuzë ndaj gjashtë personave — S.K., A.K., F.F., L.A., A.F. dhe D.G. — për blerjen, posedimin dhe shpërndarjen e paautorizuar të narkotikëve në Suharekë.

Sipas aktakuzës, i pandehuri S.K. më 29 janar 2026 është gjetur në posedim të 30 qeseve me marihuanë. Ekspertiza forenzike konfirmoi se substanca përmban THC, me një peshë neto të përgjithshme prej 26.60 gramësh, të cilat janë sekuestruar gjatë kontrollit.

Rasti më i rëndë është ai i A.K., i cili nga shtatori 2025 deri në janar 2026 ka shpërndarë kokainë. Te ai janë gjetur rreth 465 gramë marihuanë, 3.3 gramë kokainë, peshore digjitale, grinder dhe 2,200 euro në cash.

Përveç drogës, A.K. akuzohet edhe për mbajtjen e paautorizuar të një arme në lokalin e tij në Suharekë. Policia ka sekuestruar një pistoletë të tipit M57, një karikator dhe katër fishekë të kalibrit 7.62 mm, duke shkelur Ligjin për Armët.

I pandehuri F.F., gjithashtu aktiv nga shtatori 2025, akuzohet për shpërndarjen e kokainës. Gjatë operacionit janë sekuestruar një peshore digjitale dhe dy automjete, të cilat sipas aktakuzës janë përdorur si mjete për kryerjen e veprave penale në rajon.

Ndërsa L.A., A.F. dhe D.G. akuzohen se kanë vepruar në bashkëkryerje nga shtatori deri në nëntor 2025. Gjatë njërit prej rasteve, ata kanë siguruar mbi 300 gramë kokainë, të cilën kanë hedhur gjatë largimit me automjet për të shmangur kapjen.

Prokurori ka kërkuar konfiskimin e gjithësisë së sekuestruar: rreth 740 gram narkotikë (400g marihuanë dhe 330g kokainë), pistoleta M57, tre automjete, si dhe 2,200 euro dhe 500 franga zvicerane të fituara nga krimi. Ky rast shton listën e shqetësimeve për rritjen e kriminalitetit në Kosovë.

Burim: Insajderi
— Redaksia ZHURMA