Aksident tragjik në autostradën A1 në Itali, vdes 20-vjeçari shqiptar

Njëzetvjeçari Thomas Qirjaj me origjinë shqiptare ka humbur jetën në një aksident tragjik në autostradën A1 në Itali, pasi u përplas nga një fuoristradë teksa kishte zbritur nga automjeti për të vendosur trekëndëshin e sinjalizimit në rrugë. Ngjarja ndodhi në orët e para të së premtes, më 30 tetor, në zonën e Melegnano-s, në drejtim të San Giuliano Milanese, ndërsa i riu po udhëtonte me katër miq të tjerë në një makinë tip Volvo me targa zvicerane.

Sipas mediave italiane, makina me të cilën udhëtonte 20-vjeçari kishte humbur kontrollin pas kalimit të barrierës së autostradës në Melegnano dhe ishte përplasur me ndarësen e korsive, pa u përcaktuar ende nëse shkak ka qenë një defekt teknik apo ndonjë faktor tjetër. Pas kësaj përplasjeje fillestare, Thomas Qirjaj zbriti në karrexhatë për të vendosur shenjën e sigurisë, moment kur u godit nga një fuoristradë e drejtuar nga një 25-vjeçar nga Modena, i cili, sipas rindërtimit paraprak, nuk e kishte vënë re praninë e të riut deri në çastin e fundit.

Pas goditjes, ekipet e emergjencës dhe ambulancat mbërritën menjëherë në vendngjarje, ndërsa 20-vjeçari u transportua me urgjencë në spitalin Predabissi për shkak të gjendjes tepër të rëndë nga dëmtimet dhe rënia në asfalt. Pavarësisht përpjekjeve të mjekëve për ta shpëtuar në spital, ai ndërroi jetë, kurse katër miqtë e tij që ndodheshin në automjetin Volvo nuk pësuan dëmtime të rënda. Komuniteti në Caorso të provincës së Piacenzës, ku i riu banonte dhe ishte rritur si fëmijë i vetëm i një familjeje me origjinë shqiptare, u trondit thellë nga humbja e tij.

Kryetarja e bashkisë së Caorso-s, Roberta Battaglia, e cila është edhe mësuese dhe e njihte familjen e të riut, shprehu dhimbjen e saj dhe solidaritetin e komunitetit shkollor e administrativ për prindërit e Thomasit, duke treguar se nëna e tij punon në fabrikë kurse babai punon në Zvicër. Për zbardhjen e rrethanave të ngjarjes po hetojnë Policia Rrugore e Guardamiglio-s dhe Prokuroria e Lodit, të cilat do të kryejnë analizat toksikologjike ndaj drejtuesit të fuoristradës dhe do të rindërtojnë dinamikën e plotë të të dyja përplasjeve.