Ndahet nga jeta në Zvicër veprimtari Adem Islami
Veprimtari i shquar i çështjes kombëtare ka ndërruar jetë në moshën 72-vjeçare pas një sëmundjeje të rëndë.
Redaksia ZHURMA · · 1 min lexim
Në spitalin e qytetit Biel/Bienne të Zvicrës, në moshën 72-vjeçare, ka ndërruar jetë veprimtari i shquar i çështjes kombëtare Adem Islami, i njohur ndër bashkëveprimtarët edhe si Adem Stanishori. Lajmin për ndarjen e tij nga jeta e ka kumtuar nipi i tij, Selman Hasan Kllokoqi, i cili kujton se «Ademi ishte njeriu që na hapi dyert e shtëpisë dhe të zemrës». Bashkëshortja e tij, Miradia, gjithashtu ka dhënë një kontribut të jashtëzakonshëm duke hapur dyert dhe duke shtruar sofrën për bashkëveprimtarët ndër vite.
Veprimtari Elfi Agushi është shprehur se «Ademit të gjithë i kemi borxh» dhe se ai ishte një atdhetar që interesat e Kosovës i vendoste mbi ato personale. Adem Islami kujtohet për angazhimin e tij në demonstrata dhe manifestime në mbështetje të Kosovës, duke udhëtuar me veturën e tij BMW ngjyrë të verdhë në rrethana të vështira politike dhe nën kërcënimin e shërbimeve sekrete jugosllave.
Si i përndjekur nga UDB-ja jugosllave, atij iu mohua kthimi në vendlindje deri në çlirimin e Kosovës. Megjithatë, largësia fizike nuk e ndau kurrë nga atdheu, të cilin e mbajti gjithmonë në zemër dhe në çdo veprim të tij.
