Akademia e Shkencave nderon Dhimitër Shuteriqin

TIRANË — Akademia e Shkencave e Shqipërisë ka kujtuar sot në ditën e lindjes akademikun Dhimitër Shuteriqi, një nga figurat më të rëndësishme të kulturës, letërsisë dhe studimeve albanologjike. Ai lindi më 12 korrik 1915 në Elbasan, në një familje me tradita intelektuale.

Dhimitër Shuteriqi ishte i biri i Simon Shuteriqit, pjesëmarrës në Kongresin e Manastirit dhe Kongresin e Elbasanit, si dhe një ndër themeluesit e Normales së Elbasanit. Shkollimin fillor dhe të mesëm e ndoqi në Liceun e Korçës, ndërsa studimet e larta i përfundoi në universitetet e Grenoblit dhe Lionit në Francë.

Pas kthimit në Shqipëri, ai u angazhua në arsim dhe në jetën kulturore, duke dhënë mësim në Elbasan gjatë viteve 1942-1943. Shuteriqi u bë i njohur si shkrimtar, studiues dhe historian i letërsisë shqiptare, duke botuar romane, tregime dhe studime të shumta.

Si studiues, ai pati një rol të rëndësishëm në hulumtimin e traditës letrare shqiptare, duke ndriçuar figura të hershme të shkrimit shqip dhe duke hedhur bazat e historiografisë letrare shqiptare. Punështë e tij kontribuoi në krijimin e një panorame më të plotë të rrugëtimit të letërsisë shqipe nga autorët e vjetër deri te krijuesit modernë.

Burim: KultPlus
— Redaksia ZHURMA