Aston Villa paralajmëron padi ndaj Jamie Carragher për fyerjet

Klubi i Premier League, Aston Villa, ka paralajmëruar ndërmarrjen e veprimeve ligjore ndaj ish-futbollistit dhe analistit televiziv Jamie Carragher. Vendimi u bë publik nga bashkëpronari dhe presidenti i klubit anglez, Nassef Sawiris, përmes një deklarate në rrjetet sociale, pas komenteve të bëra në emisionin «Stick to Football».

Gjatë emisionit, Carragher diskutoi mundësinë e largimit të trajnerit Unai Emery drejt Manchester United, duke argumentuar se ky i fundit është një klub i një niveli më të lartë dhe me histori e ambicie më të mëdha. Ish-mbrojtësi u drejtua tifozëve të Aston Villa-s me një shprehje fyese, duke deklaruar se klubi i tyre «nuk do të jetë kurrë Manchester United».

Sawiris konfirmoi se klubi nuk do ta lërë çështjen me kaq. «Aston Villa do të nisë procedura ligjore ndaj Jamie Carragher për fyerjet e tij të papranueshme ndaj klubit dhe tifozëve tanë. Aston Villa nuk do të lejojë askënd të pengojë ngjitjen tonë në futbollin anglez dhe atë evropian», u shpreh presidenti i klubit. Ndërkohë, trajneri Unai Emery ka shprehur kënaqësinë për qëndrimin te skuadra nga Birminghami dhe synimin për ta kualifikuar klubin në Champions League në çdo sezon.