Ahmeti alarmon për goditjet ndaj Marrëveshjes së Ohrit
Kryetari i BDI-së takoi ambasadoren Özlem Canel, duke theksuar se vonesat në integrimin evropian krijojnë pasiguri politike dhe ekonomike në vend.
SHKUP — Kryetari i Bashkimit Demokratik për Integrim, Ali Ahmeti, ka shprehur shqetësimin e tij për goditjet e vazhdueshme ndaj Marrëveshjes së Ohrit gjatë një takimi të zhvilluar me ambasadoren e Holandës, Özlem Canel. Ahmeti theksoi se ky dokument mbetet themeli i paqes, i stabilitetit dhe i funksionimit demokratik në vend.
Në këtë bashkëbisedim, Ahmeti nënvizoi se integrimi i shpejtë në Bashkimin Evropian është i domosdoshëm për të parandaluar pasiguritë politike, shoqërore dhe ekonomike. Sipas tij, çdo vonesë e mëtejshme në këtë proces integrues rrezikon ta largojë vendin nga perspektiva evropiane si dhe të dobësojë institucionet shtetërore.
Lideri i BDI-së u bëri thirrje partnerëve ndërkombëtarë që ta dëgjojnë alarmin për zhvillimet politike, sundimin e ligjit dhe sfidat me të cilat përballet rajoni. Ai nënvizoi se rruga evropiane dhe Marrëveshja e Ohrit janë dy shtyllat kryesore ku mbështetet e ardhmja e vendit.
Burim: Almakos
— Redaksia ZHURMA