AFA përgëzon shqiptarët e Luginës për ulëset në Kuvendin e Serbisë

Organizata “Albanians for America” ka përgëzuar përfaqësuesit politikë shqiptarë nga Lugina e Preshevës për sigurimin e pritshëm të dy ulëseve në Kuvendin e Serbisë, duke e cilësuar këtë arritje si hap të rëndësishëm për përfaqësimin në Preshevë, Bujanoc dhe Medvegjë. Sipas AFA-së, ky zhvillim mundëson fuqizimin e zërit të komunitetit shqiptar në institucionet e Serbisë dhe avancimin e kërkesave për të drejta të barabarta e zhvillim ekonomik.

Ragmi Mustafi nga Këshilli Kombëtar Shqiptar ka deklaruar se rezultati pas zgjedhjeve në Serbi është një arritje e jashtëzakonshme për shqiptarët, duke shtuar se deri tani janë dy deputetë nga Koalicioni Shqiptar, ndërsa po pritet edhe mundësia për mandatin e tretë. Ai ka theksuar se pasivizimi i adresave e ka vështirësuar në masë të madhe mundësinë për një mandat të tretë në parlament.

Koalicioni Shqiptar në Serbi, i drejtuar nga Shaip Kamberi, do të përfaqësohet në parlamentin serb nga vetë Kamberi dhe deputeti Visar Mehmeti. Drejtuesi i koalicionit, në një intervistë për Klan, ka akuzuar presidentin serb se me politikat e tij kishte krijuar urrejtje ndaj shqiptarëve dhe kishte rrënjosur albanofobi në shtet.

Organizata AFA ka vlerësuar se kalimi nga protestat në rrugë drejt ndryshimeve përmes zgjedhjeve dëshmon fuqinë e pjesëmarrjes qytetare, por ka shtuar se ndryshimi i udhëheqjes politike nuk nënkupton domosdoshmërisht ndryshim të drejtimit politik. “Ndryshimi politik krijon një mundësi. Respektimi i të drejtave, pajtimi dhe udhëheqja e përgjegjshme do të përcaktojnë nëse kjo mundësi do të sjellë përparim të qëndrueshëm”, thuhet në reagimin e organizatës.