40 vite për artizanatin, mjeshtrja që hapi ateliene në Korçë
Bruna Zguro synon të krijojë një hapësirë ku tradita shqiptare të vazhdojë të jetojë përmes punimeve të dorës
KORÇË — Pas më shumë se 40 vitesh të përkushtuara tek artizanati, Bruna Zguro ka hapur në Korçë atelienë “Arti në duart e gruas”, një hapësirë ku ndërthuren tradita, krijimtaria dhe punimet e dorës, por edhe një vend ku do të promovohen zanatet tradicionale dhe do të mbështeten artizanët vendas.
Nga qëndisjet tradicionale e deri te veshjet, çantat, aksesorët dhe suveniret, Bruna ka zgjeruar krijimtarinë e saj duke iu përshtatur kërkesave të kohës, pa hequr dorë nga puna artizanale. Çdo produkt është i punuar ose i personalizuar me dorë, duke ruajtur veçantinë dhe identitetin e tij.
Një pjesë e rëndësishme e angazhimit të saj mbetet edhe puna me fëmijët dhe të rinjtë, të cilët i nxit të mësojnë punimet e dorës dhe të ruajnë zanatet tradicionale, në një kohë kur teknologjia po i largon gjithnjë e më shumë nga këto profesione.
Përmes kësaj atelieje, Bruna Zguro synon të krijojë një hapësirë ku tradita shqiptare të vazhdojë të jetojë përmes punimeve të dorës, duke i dhënë një mundësi të re promovimit të artizanatit dhe përcjelljes së tij te brezat e ardhshëm.
Burim: Top Channel, https://top-channel.tv/2026/07/25/40-vite-per-artizanatin-mjeshtrja-qe-hapi-ateliene-ne-korce-synon-te-mbaje-gjalle-zanatet-tradicionale/ — Redaksia ZHURMA
