30 ditë paraburgim për të dyshuarin për vdekjen e punëtorit në Zubin Potok

Gjykata Themelore në Mitrovicë – Dega në Zubin Potok ka caktuar masën e paraburgimit prej 30 ditësh ndaj të pandehurit me inicialet B.B., njoftuan burime të ndryshme. Vendimi lidhet me vdekjen e Bajram Selimit, i cili humbi jetën më 1 shtator gjatë punës në një objekt në ndërtim në Zubin Potok.

Kërkesa për paraburgim u paraqit nga Prokuroria Themelore në Mitrovicë, për shkak të dyshimit të bazuar për veprën penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”. Sipas gjykatës, masa llogaritet nga 1 shtatori 2026 dhe zgjat deri më 1 tetor 2026.

Selimi u rrëzua nga objekti në ndërtim i stacionit policor dhe, pavarësisht dërgimit në spital, nuk i mbijetoi plagëve. Rasti kishte ndodhur rreth orës 10:00, sipas konfirmimit të Erduan Baliqit nga Drejtoria Rajonale e Policisë së Kosovës në Mitrovicë-Veri.