IQMT mbyll biznes të paregjistruar dhe gjobon tjetrin me 6 mijë euro në Zubin Potok

Inspektorati Qendror i Mbikëqyrjes së Tregut (IQMT) ka mbyllur një biznes në Zubin Potok pasi u zbulua se operonte pa qenë i regjistruar në Agjencinë për Regjistrimin e Bizneseve të Kosovës (ARBK). Gjatë inspektimeve janë konfiskuar edhe produkte pa deklaracion të prejardhjes.

Në të njëjtën veprimtari, një subjekt tjetër ekonomik është gjobitur me 6.000 euro për shërbimin e pijeve alkoolike personave të mitur. Masat janë pjesë e angazhimit të Ministrisë së Industrisë, Ndërmarrësisë, Tregtisë dhe Inovacionit për mbrojtjen e konsumatorëve dhe garantimin e një tregu të sigurt, sipas njoftimit zyrtar të datës 13.10.2026.