Zvicra dëbon çiftin nga Kosova që përfitoi ndihmë sociale

Gjykata Supreme Federale e Zvicrës ka refuzuar ankesën e një çifti nga Kosova kundër mosrinovimit të lejeve të qëndrimit, duke lënë në fuqi urdhrin për largimin e tyre nga vendi. Vendimi ka ardhur pas vlerësimit se varësia afatgjatë nga ndihma sociale dhe integrimi i pamjaftueshëm justifikojnë vendimin e autoriteteve.

Sipas dokumenteve gjyqësore, çifti jetonte në Zvicër që nga viti 1998 dhe kishte përfituar ndihmë sociale për rreth 24 vjet. Vetëm gjatë periudhës nga viti 2015 deri në shtator të vitit 2024, shuma e ndihmave të marra kishte arritur në mbi 341 mijë franga zvicerane.

Gjatë shqyrtimit të rastit, gjykata i kushtoi rëndësi të veçantë mungesës së integrimit ekonomik në tregun e punës. Bashkëshorti kishte punuar vetëm rreth tre vjet gjatë gjithë qëndrimit, ndërsa bashkëshortja kishte provuar të punonte vetëm pesë ditë në vitin 2010. Megjithëse dy fëmijët e tyre kishin fituar shtetësinë zvicerane, gjykata vlerësoi se nuk ishin dëshmuar përpjekje të mjaftueshme për gjetjen e punësimit.