Zejnulla zgjidhet ministër pa resor — 67 vota pro
Kreu i Partisë Demokratike të Turqve u emërua pas kalimit të subjektit të tij në koalicionin qeveritar të udhëhequr nga VMRO-DPMNE.
SHKUP — Kuvendi i Maqedonisë së Veriut ka zgjedhur Zulfiqar Zejnullaun ministër pa resor me 67 vota pro dhe 13 kundër, në një votim të ndarë nga kabineti qeveritar. Ky vendim u mor veçmas për të shmangur procedurat e zgjedhjes së një qeverie të re, pasi rikonstruimi i plotë do të tejkalonte pragun ligjor.
Kryeministri Hristijan Mickoski e arsyetoi propozimin duke theksuar se institucionet duhet të udhëhiqen nga njerëz të gatshëm për të marrë përgjegjësi në interes të të gjithë qytetarëve. Mickoski kërkoi mbështetjen e deputetëve për parimin e hapjes së qeverisë ndaj individëve me kapacitet dhe qëllime të sinqerta, pa dallime etnike apo politike.
Nga ana tjetër, opozita reagoi me kritika të ashpra ndaj këtij emërimi. Skender Rexhepi nga Lëvizja Populli e quajti këtë post si një "ministri për ajran". Sipas tij, pasi koalicioni VLEN mban një ministri me resor që ai e quajti për byrek, komuniteti turk po merr një ministri pa resor vetëm për të plotësuar kombinimin.
Lidhja Socialdemokrate e Maqedonisë gjithashtu u shpreh kundër zgjedhjes së Zejnullaut. Oliver Spasovski nga kjo parti deklaroi se ky emërim nuk do të ndryshojë asgjë në qeverisje. Spasovski shtoi se Zejnulla do të jetë vetëm një ministër për votimin me Badenter dhe pyeti se pse ky përfaqësim nuk u sigurua që në fillim.
Zejnulla, i cili drejton Partinë Demokratike të Turqve, u rreshtua në koalicion me partinë në pushtet pasi u largua nga Fronti Evropian. Ky vendim solli edhe deputetin Bejxhan Iljas në shumicën parlamentare, duke rritur kështu numrin e deputetëve të koalicionit qeverisës në Kuvendin e Maqedonisë së Veriut.
Burim: TV21
— Redaksia ZHURMA