Zjarr në fshatin Picar të Gjirokastrës, flakët drejt banesave
Një vatër zjarri ka përfshirë zonën pyjore në hyrje të fshatit Picar në Gjirokastër, duke rrezikuar zonën e banuar dhe duke sjellë angazhimin e zjarrfikësve në terren.
Redaksia ZHURMA · · 1 min lexim
GJIROKASTËR — Një vatër zjarri është aktivizuar në zonën e quajtur Kurora e Gjelbër, në hyrje të fshatit Picar të Gjirokastrës, duke përfshirë një sipërfaqe pyjore dhe duke paraqitur rrezik për përhapjen e flakëve drejt zonës së banuar.
Terreni për ndërhyrje paraqitet i vështirë për shkak të dendësisë së shkurreve, bimësisë dhe pemëve. Menjëherë drejt vendngjarjes janë nisur dy grupe të shërbimit zjarrfikës, ndërsa në terren vijojnë përpjekjet për vënien nën kontroll të vatrës dhe për të parandaluar afrimin e flakëve pranë banesave.
