Zjarr i madh në Librazhd rrezikon banesat, ndërhyrë helikopteri

Një zjarr i përmasave të mëdha ka pushtuar një masiv pyjor me akaci dhe shkurre në zonën midis fshatrave Xhyrë dhe Vehçan, në Njësinë Administrative Hotolisht, Bashkia Librazhd. Vatra ka nisur rreth mesditës dhe përhapet me shpejtësi për shkak të terrenit të vështirë dhe bimësisë së thatë.

Flakët kanë afruar lagjen pranë ish-stacionit të trenit në Xhyrë, duke krijuar rrezik të drejtpërdrejtë për banesat. Për të parandaluar përfshirjen e shtëpive, po vepron një helikopter ndërhyrës apo nga ajri, ndërsa në tokë janë mobilizuar dhjetëra forca dhe mjete zjarrfikëse nga Librazhdi, Prrenjasi, Elbasani, Gramshi dhe Cërriku.

Operacioni vazhdon pa ndërprerje. Terreni i vështirë, sipërfaqja e madhe e djegur dhe afërsia me rrugën kombëtare Librazhd-Prrenjas bëjnë situatën ende kritike. Forcat po përqendrojnë ndërhyrjen në pikat më të rrezikuara për të frenuar avancimin e zjarrit dhe mbrojtur objekte.