Ymeri: Prokuroria vërtetoi manipulimet në çmimet e energjisë

Deputetja e Lidhjes Demokratike të Kosovës, Janina Ymeri, deklaroi në emisionin «EURO n’T7» se Prokuroria dhe Zyra e Rregullatorit për Energji kanë vërtetuar manipulimet në tregtinë e energjisë elektrike, duke shtuar se për shkak të këtyre shkeljeve kanë pësuar të gjithë qytetarët e vendit. Sipas saj, importi i energjisë elektrike gjatë vitit 2026 arrin shifrën prej 669 mijë eurosh për çdo ditë, ndërsa vlera totale e importit deri më datën 1 tetor ka kapur shifrën e 182 milionë eurove.

Deputetja e LDK-së theksoi se kompanitë për të cilat është folur edhe më herët ndodhen në proces të rilicencimit, por tregtia me energji po vazhdon njëjtë dhe pa dhënë llogari askujt. Ajo shtoi se tregtia është zhvilluar me tregtarët preferencialë sikur në pazar dhe sikur në bahçe të babës, ndërsa njëjtë pritet të ndodhë edhe me ligjin e ri ku parashihet që tregtimi i energjisë të bëhet lirshëm në bazë të interesave ekonomike të secilit pjesëmarrës.

Ymeri bëri thirrje për presion më të madh ndaj qeverisë për të mos lejuar dëmtimin e konsumatorëve, duke kujtuar se vitin e kaluar, për shkak të presionit të qytetarëve, u ndal rritja e sërishme e çmimit të energjisë elektrike. Ajo ngriti shqetësimin se Dogana në disa raste nuk ka treguar as emrat e tregtarëve të energjisë, ndërsa ZRRE-ja nuk ka treguar për ndonjë hulumtim të bërë.

Kritika pati edhe për ministrinë për formimin e një task-force për ta menaxhuar tregtinë me energji, veprim të cilin deputetja e krahasoi me një bixhoz në nivel vendi. Ajo përfundoi duke theksuar se Kosova paguan çmim të lartë për energjinë e importuar edhe për shkak të mosplanifikimit të mirë të shpenzimit dhe prodhimit të energjisë elektrike.